செம்பாட்டுப்பிள்ளையார் என்று அன்பாக எல்லோராலும் அழைக்கப்படும் எமது விநாயகன் இன்று தேரேறி வீதிவலம் வந்து பக்தர்களுக்கெல்லாம் அருள்தருவான்.இந்த நிகழ்வு வருடா வருடம் நூற்றாண்டுகளுக்கு மேலாக நடந்து வரும் முக்கியமானதொரு மகிழ்ச்சிகரமான பக்திகரமான நிகழ்வு ஆகும்.இந்நாளில் அந்தணர்கள் வேதங்கள் ஓத பக்தர்கள் விநாயகனை பலவிதமாக அழைத்து வழிபட பஜனைகள் பாட மேளதாளங்கள் ஒலிக்க விநாயகன் வீதியுலா வருவது கண்கொள்ளாக்காட்சியாகும்.இப்படியொரு திருவிழாவை எமதூரும் அயல் ஊரவரும் நடாத்திக்கொண்டிருப்பது ஒரு மறக்கமுடியாதவொரு விழாவாகும்.எமதூரவர்கள் அயல் ஊரவர்கள் அனைவரும் இந்நன்நாளில் விநாயகனின் அருள்பெற்று தமது வாழ்வில் எல்லாப்பயன்களும் அடையவேண்டி பிரார்த்திக்கின்றேன்.

                                                           நன்றி

தலைவர்

நீர்வேலி நலன்புரிச்சங்கம்

இலண்டன்.

………………………………………………………………………………………………………………………………………………

லயம் என்கிற சொல் ஆன்மா ஒடுங்கும் இடம் என்றும் ஆணவம் ஒடுங்கும் இடம் என்றும் பொருள் கொள்வர் சான்றோர்.தேவாலயமானது எங்கும் வியாபகரமாய் மறைந்திருக்கும் கடவுள் தம்மை ஆன்மாக்கள் வழிபட்டு உய்யும் பொருட்டு சாந்நித்தியராய் எழுந்தருளி இருக்கும் இடமாகும்.அரசகேசரி விநாயகனும் நாம் உய்யும் வண்ணம் தோற்றம் பெற்றவனே.வழிபாட்டின் மூலம் நீர்வைமக்கள் அறிகுறியாக அறிவைப்பெருக்கியும் அருள்நெறியாக அன்பைவளர்த்தும் அனுபவவாயிலாக அழியாப்பேரின்பத்திற்கு அடிகோலியும் பெருவிழா உற்சவங்களில் தம்மை ஆற்றுப்படுத்தியும் வருகின்றனர்.செந்திமிழ் வளர்ச்சியிலும் சிவநெறி ஈடுபாட்டிலும் சிறந்து நிற்பவர்கள் நீர்வைமக்கள்.நிறைந்திருக்கும் பக்தி உணர்விற்கு இங்கு நடைபெறும் திருவிழாக்களும் வழிபாடுகளும் சான்று கூறுவன.பெருவிழாக்களில் இடம்பெறும் தேரோட்டம் மக்கள் மனதில் சமய எழுச்சியையும் பேதமற்ற மனப்பான்மையையும் விருந்தோம்பும் பண்பாட்டையும் விளக்கக் காண்கின்றோம்.

பிரபஞ்சத்தின் உள்ளேயும் வெளியேயும் நின்று அதனைப்படைத்தும் காத்தும் அழித்தும் மறைந்தும் அருளும்  இறைசன் பிரபஞ்சமாகிய தேரின் உள்ளேயும் வெளியேயும் நின்ற விநாயகப்பெருமான் ஆரோகணித்து உலாவருகின்றவேளை   எல்லோருக்கும் அருட்கடாட்சம் கிட்டவும் அமைதியும் மகிழ்வும் பூக்கவும் அன்பர்க்கு நல்லபலன் கிட்டவும் வாழ்த்துவோம் வணங்குவோம் .போற்றி உய்வோமாக.

திரு.துரை எங்கரசு

ஓய்வுபெற்ற கல்விப்பணிப்பாளர்

நீர்வேலி.

…………………………………………………………………………………………………………………….

நீர்வையம்பதியில் எழுந்தருளி கோவில் கொண்டு சகலருக்கும் தனது அருட்கடாட்சத்தை வாரி வழங்கிக் கொண்டிருக்கும் அரசகேசரியான் தேரேறி வீதி உலா வருகின்றார். இவ் அரும்பெரும் கண்கொள்ளாக்காட்சியை நியூ நீர்வேலி இணையத்தினூடாக  புலத்தில் இருக்கின்ற நாமெல்லாம் கண்டு தரிசித்து விநாயகப்பெருமானின் இஷ்டசித்திகளைப் பெறுவதற்கு ஆவலாக இருக்கின்றோம். இம்முறை இவ்வரிய சந்தர்ப்பத்தை எமக்கு ஏற்படுத்தி வழங்கிக்   கொண்டிருக்கும் நியூநீர்வேலி இணையத்தினருக்கு எமது இதயபூர்வமான நன்றிகள்.அருளும் ஆசியும் அனைவருக்கும் கிடைத்து நல்வாழ்வு வாழபிரார்த்திக்கின்றேன்

அடியவன்                                                                                                                                                                                

ஜீவாகோபாலசிங்கம்                                                                                                                                                                  

  கனடா.       

……………………………………………………………………………………………………….